വിറ്റ വാഹനത്തിന്റെ ഉടമസ്ഥാവകാശം കൈമാറിയില്ല; എറണാകുളത്ത് യുവാവിനെ കുത്തിക്കൊലപ്പെടുത്തി

കൊച്ചി: എറണാകുളം നായരമ്പലത്ത് യുവാവിനെ സുഹൃത്ത് കൊലപെടുത്തി. നായരമ്പലം സ്വദേശി സനോജ് (44 ) ആണ് കൊല്ലപ്പെട്ടത്. സനോജിനെ കുത്തിയ പ്രതി അനിൽകുമാർ പിടിയിലായി. ഇരുവരും സുഹൃത്തുക്കളായിരുന്നു. ഇന്നലെ രാത്രി 930 ഓടെ നെടുങ്ങാട് അണിയിൽ റോഡിലാണ് സംഭവം നടന്നത്. ഇവർ തമ്മിൽ വാഹന സംബന്ധമായ തർക്കം ഉണ്ടായിരുന്നു. ഇതാണ് കൊലപാതകത്തിൽ കലാശിച്ചത്. സനോജ് നേരത്തെ അനിൽകുമാറിന്റെ വാഹനം വാങ്ങിയിരുന്നു. എന്നാൽ ഓണർഷിപ്പ് കൈമാറാൻ അനിൽകുമാർ തയ്യാറായില്ല. ഇതുമായി ബന്ധപ്പെട്ട തർക്കമാണ് കൊലപാതകത്തിന് കാരണം.

ഞാറക്കൽ പോലീസാണ് സംഭവത്തിൽ കേസ് രജിസ്റ്റർ ചെയ്തിരിക്കുന്നത്. വാഹനം വാങ്ങിയ സനോജ് ഇതിന്റെ വായ്പ മുഴുവൻ അടച്ച് തീർത്തിട്ടും അനിൽകുമാർ ഓണർഷിപ്പ് കൈമാറാൻ തയ്യാറായില്ലെന്നാണ് വിവരം. പെയിന്റിങ് തൊഴിലാളിയായിരുന്നു കൊല്ലപ്പെട്ട സനോജ്. അനിൽകുമാർ കൊറിയർ സർവ്വീസ് ജീവനക്കാരനാണ്.