ബിഎംസി തെരഞ്ഞെടുപ്പ് അടുത്തത്‌ കൊണ്ടാണ് പ്രധാനമന്ത്രി മോദി ആവർത്തിച്ച് മുംബൈയിൽ വരുന്നത്: നാനാ പട്ടോലെ

മുംബൈ: ബിഎംസി തെരഞ്ഞെടുപ്പ് അടുത്തിരിക്കുകയാണെന്നും അതിനാലാണ് പ്രധാനമന്ത്രി നരേന്ദ്ര മോദി തുടർച്ചയായി മുംബൈയിൽ വരാൻ കാരണമെന്നും മഹാരാഷ്ട്ര പ്രദേശ് കോൺഗ്രസ് കമ്മിറ്റി (എംപിസിസി) പ്രസിഡന്റ് നാനാ പടോലെ.

ജനുവരി 19 ന് ബികെസി ഗ്രൗണ്ടിൽ നടന്ന റാലിയെ അഭിസംബോധന ചെയ്ത മോദി വെള്ളിയാഴ്ചയും ഒരു സമ്മേളനത്തെ അഭിസംബോധന ചെയ്തുവെന്ന് പടോലെ പ്രസ്താവനയിൽ പറഞ്ഞു. “എന്നിട്ടും ഈ രണ്ട് അവസരങ്ങളിലും അദ്ദേഹം മുംബൈയ്ക്ക് വേണ്ടി ഒന്നും വാഗ്ദാനം ചെയ്തില്ല, കർഷക ആത്മഹത്യയെക്കുറിച്ച് സംസാരിച്ചില്ല,” അദ്ദേഹം കൂട്ടിച്ചേർത്തു.

കോൺഗ്രസ് നേതാവ് രാഹുൽ ഗാന്ധി പാർലമെന്റിൽ (ഗൗതം അദാനിയെ കുറിച്ച്) ചോദ്യങ്ങൾ ഉന്നയിച്ചെങ്കിലും മോദി അതിന് മറുപടി നൽകിയില്ലെന്നും പടോലെ പറഞ്ഞു.

വലിയൊരു വിഭാഗം നിക്ഷേപകർ മഹാനഗരത്തിൽ നിന്നുള്ളവരായതിനാൽ മുംബൈയിലെങ്കിലും പ്രധാനമന്ത്രി അദാനി വിഷയത്തിൽ സംസാരിക്കുമെന്ന് പ്രതീക്ഷിച്ചിരുന്നു. എൽഐസിയുടെയും എസ്ബിഐയുടെയും ആസ്ഥാനം മുംബൈയിലാണ്, കോടിക്കണക്കിന് ഇന്ത്യക്കാർ ഈ  സ്ഥാപനങ്ങളിൽ നിക്ഷേപിച്ചിട്ടുണ്ട്. എന്നിട്ടും മോദി അദാനിയുടെ അഴിമതിയിൽ ഒന്നും പ്രതികരിച്ചില്ല. ജനങ്ങളുടെ മാനസികാവസ്ഥ ഇവർ മനസ്സിലാക്കുന്നില്ലെന്നും എല്ലാം വളരെ വ്യക്തമാണെന്നും അദ്ദേഹം പറഞ്ഞു.“

അതേസമയം താനും മുതിർന്ന നേതാവ് ബാലാസാഹേബ് തോറാട്ടും തമ്മിലുള്ള പാർട്ടിക്കുള്ളിലെ ഭിന്നതയെ കുറിച്ച് മാധ്യമങ്ങളും ബിജെപിയും വെറുതെ പറഞ്ഞു പരത്തുന്നതാണെന്നും അദ്ദേഹം പറഞ്ഞു.